A Gest of Robyn Hode

Lythe and listin, gentilmen, That be of frebore blode; I shall you tel of a gode yeman, His name was Robyn Hode. Robyn was a p[ro]ude outlaw [Whyles he walked on grounde; So curteyse an outlawe] as he was one Was neuer non founde. Robyn stode in Bernesdale And lenyd hym to a tre; And bi hym stode Litell johnn, A gode yeman was he. And alsoo dyd go[d]e Scarlok And Much, the mil[l]er’s son; There was none ynch of his bodi But it was worth a grome (groom, man). Than bespake Lytell Johnn All vntoo Robyn Hode: Maister, and ye wolde dyne betyme it wolde doo you moche gode. Than bespake hym gode Robyn: To dyne haue I noo lust, Till that I haue som bolde baron Or som vnkout[h] gest; [Till that I haue som ryche abbot] That may pay for the best, Or som knyght or [som] squyer That dwelleth here bi west. A gode maner than had Robyn; In londe where that he were, Euery day or he wold dyne Thre messis wolde he here: The one in the worship of the Fader, And another of the Holy Gost, The thirde of Our dere Lady That he loued all ther moste. Robyn loued our dere Lady; For dout of dydly synne Wolde he neuer do compani harme That any woman was in. Maistar, than sayde Lytil Johnn, And we our borde shal sprede, Tell vs wheder that we shal go And what life that we shall lede. Where we shall take, where we shall leue, Where we shall abide behynde, Where we shall robbe, where we shal reue, Where we shal bete and bynde. Therof no force, than sayde Robyn, We shall do well inowe; But loke ye do no husbonde harme That tillet[h] with his ploughe. No more ye shall no gode yeman That walketh by grene wode shawe, Ne no knyght ne no squyer That wol be a gode felawe. These bisshoppes and these archebishoppes, Ye shall them bete and bynde; The hye sherif of Notyingham, Hym holde ye in your myn[d]e. This worde shalbe holde, sayde Lytell Johnn, And this lesson we shall lere; It is fer dayes (late in the day); God sende vs a gest, That we were at oure dynere! Take thy gode bowe in thy honde, sayde Robyn; Late Much wende with the, And so shal Willyam Scarlok, And no man abyde with me. And walke vp to the Saylis And so to Watlinge Stret[e], And wayte after some vnknuth gest; Vp chaunce ye may them mete. Be he erle or ani baron, Abbot or ani knyght, Bringhe hym to lodge to me; His dyner shall be dight. They wente vp to the Saylis, These yeman all thre; They loked est, they loke[d] weest; They myght no man see. But as they loked in to Bernysdale Bi a derne (hidden) strete Than came a knyght ridinghe; Full sone they gan hym mete. All dreri was his semblaunce And lytell was his pryde; His one fote in the styrop stode, That othere wauyd (dangled) beside. His hode hanged in his iy[e]n two, He rode in symple aray; A soriar man than he was one Rode neuer in somer day. Litell Johnn was full curteyes And sette hym on his kne: Welcom be ye, gentyll knyght, Welcom ar ye to me. Welcom be thou to grene wode, Hende (gracious) knyght and fre; My maister hath abiden you fastinge, Syr, al these oures thre. Who is thy maister? sayde the knyght; Johnn sayde, Robyn Hode. He is [a] gode yoman, sayde the knyght, of hym I haue herde moche gode. I graunte, he sayde, with you to wende, My bretherne, all in fere (together); My purpos was to haue dyned to day At Blith or Dancastere. Furth than went this gentyl knight With a carefull chere; The teris oute of his iyen ran And fell downe by his lere (cheek). They brought hym to the lodge dore; Whan Robyn hym gan see, Full curtesly dyd of his hode And sette hym on his knee. Welcome, sir knight, than sayde Robyn, Welcome art thou to me; I haue abyden you fastinge, sir, All these ouris thre. Than answered the gentyll knight With wordes fayre and fre: God the saue, goode Robyn, And all thy fayre meyne (company). They wasshed togeder and wyped bothe And sette to theyr dynere; Brede and wyne they had right ynough[e] And noumbles (viscera, innards) of the dere. Swannes and fe[s]sauntes they had full gode, And foules of the ryuere; There fayled none so litell a birde That euer was bred on bryre. Do gladly, sir knight, sayde Robyn; Gramarcy, sir, sayde he: Suche a dinere had I nat Of all these wekys thre. If I come ageyne, Robyn, Here by thys contre, As gode a dyner I shall the make As that thou haest made to me. Gramarcy, knyght, sayde Robyn; My dyner whan that I it haue, I was neuer so gredy, bi dere worthy God, My dyner for to craue. But pay or ye wende, sayde Robyn; Me thynketh it is gode ryght; It was neuer the maner, by dere worthi God, A yoman to pay for a kny[g]ht. I haue nought in my coffers, saide the knyght, That I may profer for shame: [Litell] Johnn, go loke, sayde Robyn, Ne let nat for no blame. Tel me truth, than saide Robyn, So God [haue] parte of [th]e: I haue no more but [ten] shelynges, sayde the knyght, So God haue parte of me. If thou hast no more, sayde Robyn, I woll nat one peny; And yf thou haue nede of any more, More shall I lend the. Go nowe furth, Littell Johnn, The truth tell thou me; If there be no more but [ten] shelinges, No peny that I se. Lyttell Johnn sprede downe hys mantell Full fayre vpon the grounde, And there he fonde in the knyghtes cofer But euen halfe [a] pounde. Littell Johnn let it lye full styll And went to hys maysteer lowe. What tidynges, Johnn? sayde Robyn; Sir, the knyght is true inowe. Fyll of the best wine, sayde Robyn, The knyght shall begynne; Moche wonder thinketh me Thy clot[h]ynge is so thin[n]e. Tell me [one] worde, sayde Robyn, And counsel [in confidence] shal it be; I trow thou warte made a knyght of force Or ellys of yemanry. Or ellys thou has bene a sori husbande And lyued in stro[k]e and stryfe; An okerer (usurer), or ellis a lechoure, sayde Robyn, Wyth wronge hast led thy lyfe. I am none of those, sayde the knyght, By God that made me; An hundred wynter here before Myn auncetres knyghtes haue [be]. But oft it hath befal, Robyn, A man hath be disgrate (unfortunate); But God that sitteth in heuen aboue May amende his state. Withyn this two yere, Robyne, he sayde, My neghbours well it knowe, Foure hundred pounde of gode money Ful well than myght I spende. Nowe haue I no gode, saide the knyght —God had shaped such an ende— But my chyldren and my wyfe, Tyfl God yt may amende. In what maner, than sayde Robyn, Hast thou lorne thy rychesse? For my greate foly, he sayde, And for my kynd[e]nesse. I hade a sone, forsoth, Robyn, That shulde hau[e] ben myn ayre, Whanne he was twenty wynter olde In felde wolde iust (joust) full fayre. He slewe a knyght of Lancaster And a squyer bolde; For to saue hym in his ryght My godes both sette (priced) and solde. My londes both sette to wedde (mortgaged), Robyn, Vntyll a certayn day, To a ryche abbot here besyde Of Seynt Mari Abbey. What is the som? sayde Robyn; Trouth than tell thou me: Sir, he sayde, foure hundred pounde; The abbot told it to me. Nowe and thou lese thy lend, sayde Robyn, What woll fall of the? Hastely I wol me buske (get ready to go), sayd the knyght, Ouer the salte see, And se w[h]ere Criste was quyke and dede On the mount of Caluere; Fare wel, frende, and haue gode day, It ma no better be. Teris fell out of hys iyen two; He wolde haue gone hys way: Farewel, frende, and haue gode day, I ne haue no more to pay. Where be thy frendes? sayde Robyn: Syr, neuer one wol me knowe; While I was ryche ynowe at home Great boste than wolde they blowe. And nowe they renne away fro me As bestis on a rowe; They take no more hede of me Thanne they had me neuer sawe. For ruthe thanne wept Litell Johnn, Scarlok and Muche in fere; Fyl of the best wyne, sayde Robyn, For here is a symple chere. Hast thou any frende, sayde Robyn, Thy borowe (surety) that wolde be? I haue none, than sayde the knyght, But God that dyed on tree. Do away thy iapis (japes, jests), than sayde Robyn, Thereof wol I right none; Wenest thou I wolde haue God to borowe, Peter, Poule, or Johnn? Nay, by hym that me made And shope (created) both sonne and mone, Fynde me a better borowe, sayde Robyn, Or money getest thou none. I haue none other, sayde the knyght, The sothe for to say, But yf yt be Our dere Lady, She fayled me neuer or thys day. By dere worthy God, sayde Robyn, To seche all Englonde thorowe, Yet fonde I neuer to my pay A moche better borowe. Come nowe furth, Litell Johnn, And go to my tresoure, And bringe me foure hundered pound[e], And loke well tolde it be. Furth than went Litell Johnn And Scarlok went before; He tolde oute foure hundred pounde [By eight and twenty] score. Is thys well tolde? sayde [litell] Much; Johnn sayde, What gre[ue]th the? It is almus (alms) to helpe a gentyll knyght That is fal in pouerte. Master, than sayde Lityll John, His clothinge is full thynne; Ye must gyue the knight a lyueray To [lap]pe his body therin. For ye haue scarlet and grene, mayster, And man[y] a riche aray; Ther is no marchaunt in mery Englond So ryche, I dare well say. Take hym thre yerdes of euery colour And loke well mete (measured) that it be; Lytell Johnn toke none other mesure But his bowe tree. And at euery handfull that he met He leped footes three; What deuylles drapar, sayid litell Muche, Thynkest thou for to be? Scarlok stode full stil and loughe, And sayd, By God Almyght, Johnn may gyue hym gode mesure For it costeth hym but lyght. Mayster, than said Litell Johnn To gentill Robyn Hode: Ye must giue the knig[h]t a hors To lede home this gode. Take hym a gray coursar, sayde Robyn, And a saydle newe; He is Oure Ladye’s messangere, God grant that he be true. And a gode palfray, sayde lytell Much, To mayntene hym in his right; And a peyre of botes, sayde Scarlok, For he is a gentyll knight. What shalt thou gyue hym, Litell John? said Robyn; Sir, a peyre of gilt sporis clene, To pray for all this company; God bringe hym oute of tene (trouble). Whan shal mi day be, said the knight, Sir, and your wyll be? This day twelue moneth, saide Robyn, Vnder this grene wode tre. It were greate shame, sayde Robyn, A knight alone to ryde, Withoute squyre, yeman or page To walke by his syde. I shall the lende Litell John, my man, For he shalbe thy knaue; In a yema[n]’s stede he may the stande If thou greate nede haue. The Seconde Fytte Now is the knight gone on his way; This game hym thought full gode; Whanne he loked on Berne[sd]ale He blessyd Robyn Hode. And whanne he thought on Bernysdale, On Scarlok, Much, and Johnn, He blyssyd them for the best company That euer he in come. Then spake that gentyll knyght, To Lytel Johan gan he saye: To-morrowe I must to Yorke toune To Saynt Mary abbay. And to the abbot of that place Foure hondred pounde I must pay; And but I be there vpon this nyght My londe is lost for ay. The abbot sayd to his couent, There he stode on grounde: This day twelfe moneth came there a knyght And borowed foure hondred pounde. [He borowed foure hondred pounde] Upon all his londe fre; But he come this ylke (same) day Dysheryte shall he be. It is full erely, sayd the pryoure, The day is not yet ferre gone; I had leuer to pay an hondred pounde And lay downe anone. The knyght is ferre beyonde the see, In Englonde [is his] right, And suffreth honger and colde And many a sory nyght. It were grete pyte, said the pryoure, So to haue his londe; An ye be so lyght of your consyence Ye do to hym moch wronge. Thou art euer in my berde, sayd the abbot, By God and Saynt Rycharde! With that cam in a fat-heded monke, The heygh selerer (cellarer). He is dede or hanged, sayd the monke, By God that bought me dere; And we shall haue to spende in this place Foure hondred pounde by yere. The abbot and the hy selerer Sterte forthe full bolde; The [hye] iustyce of Englonde The abbot there dyde holde (retain as counsel). The hye iustyce and many mo Had take in to they[r] honde Holy all the knyghtes det, To put that knyght to wronge. They demed (deemed, condemned) the knyght wonder sore, The abbot and his meyne: But he come this ylke day Dysheryte shall he be. He wyfl not come yet, sayd the iustyce, I dare well vndertake; But in sorowe tyme for them all The knyght came to the gate. Than bespake that gentyll knyght Untyll his meyne: Now put on your symple wedes That ye brought fro the see. [They put on their symple wedes,] They came to the gates anone; The porter was redy hymselfe And welcomed them euerychone. Welcome, syr knyght, sayd the porter: My lorde to mete (meat, dinner) is he, And so is many a gentyll man For the loue of the. The porter swore a full grete othe: By God that made me, Here be the best coresed hors That euer yet sawe I me. Lede them in to the stable, he sayd, That eased myght they be; They shall not come therin, sayd the knyght, By God that dyed on a tre. Lordes were to mete isette in that abbotes hall; The knyght went forth and kneled downe, And salued (hailed) them grete and small. Do gladly, syr abbot, sayd the knyght, I am come to holde my day: The fyrst word the abbot spake, Has thou brought my pay? Not one peny, sayd the knyght, By God that maked me. Thou art a shrewed dettour, sayd the abbot; Syr iustyce, drynke to me. What doost thou here, sayd the abbot, But thou haddest brought thy pay? For God, than sayd the knyght, To pray of a lenger daye. Thy daye is broke, sayd the iustyce, Londe (loan) getest thou none. Now, good syr iustyce, be my frende, And fende me of my fone (foes)! I am holde with the abbot, sayd the iustyce, Both with cloth and fee. Now, good syr sheryf, be my frende! Nay, for God, sayd he. Now, good syr abbot, be my frende For thy curteyse, And holde my londes in thy honde Tyll I haue made the gree (satisfied)! And I wyll be thy true seruaunte And trewely serue the[e] Tyl ye haue foure hondred pounde Of money good and free. The abbot sware a full grete othe: By God that dyed on a tre, Get the londe where thou may For thou getest none of me. By dere worthy God, then sayd the knyght, That all this worlde wrought, But I haue my londe agayne Full dere it shall be bought. God that was of a mayden borne Leue vs well to spede (prosper)! For it is good to assay a frende Or that a man haue nede. The abbot lothely on hym gan loke (look), And vylaynesly hym gan [call]: Out, he sayd, thou false knyght, Spede the out of my hall! Thou lyest, then sayd the gentyll knyght, Abbot, in thy hal; False knyght was I neuer, By God that made vs all. Vp then stode that gentyll knyght, To the abbot sayd he: To suffre a knyght to knele so longe Thou canst no curteysye. In ioustes and in tournement Full ferre (far) than haue I be, And put my selfe as ferre in prees As ony that euer I se. What wyll ye gyue more, sayd the iustyce, And (if) the knyght sall make a releyse (quittance)? And elles dare I safly swere Ye holde neuer your londe in pees. An hondred pounde, sayd the abbot; The justice sayd, Gyue hym two; Nay, be God, sayd the knyght, Yit gete ye it not so. Though ye wolde gyue a thousand more, Yet were ye neuer the nere (nearer); Shall there neuer be myn heyre Abbot, iustice, ne frere. He stert (stirred) hym to a borde anone, Tyll a table rounde, And there he shoke oute of a bagge Euen four hondred pound. Haue here thi golde, sir abbot, saide the knight, Which that thou lentest me; Had thou ben curtes at my comynge Rewarded shuldest thou haue be. The abbot sat styll and ete no more, For all his ryall fare; He cast his hede on his shulder And fast began to stare. Take me my golde agayne, saide the abbot, Sir iustice, that I toke the. Not a peni, said the iustice, Bi Go[d, that dy]ed on tree. Sir [abbot, and ye me]n of lawe, Now haue I holde my daye; Now shall I haue my londe agayne For ought that you can saye. The knyght stert out of the dore, Awaye was all his care, And on he put his good clothynge, The other he lefte there. He wente hym forth full mery syngynge As men haue tolde in tale; His lady met hym at the gate At home in Verysdale. Welcome, my lorde, sayd his lady: Syr, lost is all your good? Be mery, dame, sayd the knyght, And pray for Robyn Hode, That euer his soule be in blysse: He holpe me [out of] tene (trouble); Ne had be his kyndenesse, Beggers had we bene. The abbot and I accorded ben, He is serued of his pay; The god yoman lent it me As I cam by the way. This knight than dwelled fayre at home, The sothe for to saye, Tyll he had gete four hundred pound Al redy for to pay. He purueyed bim an hundred bowes, The strynges well ydyght (rigged), An hundred shefe of aro[wes] gode, The hedys burneshed full bryght; And euery arowe an [e]lle longe, With pecok wel idyght, [Ynocked] all with whyte siluer; It was a semely syght. He purueycd hym an [hondreth men] Well harness[ed in that stede], And hym selfe in that same sete And clothed in whyte and rede. He bare a launsgay (lance) in his honde, And a man ledde (carried on a horse) his male (bag), And reden (they rode) with a lyght songe Vnto Bernysdale. But as he went at a brydge ther was a wrastelyng, And there taryed was he, And there was all the best yemen Of all the west countree. A full fayre game there was vp set, A whyte bulle vp i-pyght (placed), A grete courser, with sadle and brydil, With golde burnyssht full bryght. A payre of gloues, a rede golde rynge, A pype (cylinder) of wyne, in fay; What man that bereth hym best i-wys The pryce shall bere away. There was a yoman in that place, And best worthy was he, And for he was ferre and frembde bested, (and because he was in the plight of a stranger from afar), Slayne he shulde haue be. The knight had ruthe of this yoman In place where he stode; He sayde that yoman shulde haue no harme, For loue of Robyn Hode. The knyght presed in to the place, An hundreth folowed hym [fre], With bowes bent and arowes sharpe For to shende (put to shame) that companye. They shulderd (shouldered, shoved) all and made hym rome To wete (know) what he wolde say; He toke the yeman bi the hande And gaue hym al the play. He gaue hym fyue marke for his wyne, There it lay on the molde, And bad it shulde be set a broche (abroach), Drynke who so wolde. Thus longe taried this gentyll knyght Tyll that play was done; So longe abode Robyn fastinge Thre houres after the none. The Thirde Fytte Lyth and lystyn, gentilmen, All that nowe be here; Of Litell Johnn, that was the knightes man, Goode myrth ye shall here. It was vpon a mery day That yonge men wolde go shete (shoot); Lytell Johnn fet (fetched) his bowe anone And sayde he wolde them mete. Thre tymes Litell John shet aboute And alwey he slet (slit, split) the wande; The proude sherif of Notingham By the markes can stande. The sherif swore a full greate othe: By hym that dyede on a tre, This man is the best arschcre That euer yet sawe I [me]. Say me nowe, wight yonge man, What is nowe thy name? In what countre were thou borne, And where is thy wonynge wane (dwelling-place)? In Holdernes, sir, I was borne, lwys al of my dame; Men cal me Reynolde Grenclef Whan I am at home. Sey me, Reyno[l]de Grenclefe, Wolde thou dwell with me? And euery yere I woll the gyue Twenty marke to thy fee. I haue a maister, sayde Litell Johnn, A curteys knight is he; May ye leue get of hym The better may it be. The sherif gate Litell John Twelue monethes of the knight; Therfore he gaue him right anone A gode hors and a wight. Nowe is Litell John the sherifes man —God lende vs well to spede! But alwey thought Lytell John To quyte hym wele his mede (reward). Nowe so God me helpe, sayde Litell John, And by my true leutye (loyalty), I shall be the worst seruaunt to hym That euer yet had he. It fell vpon a Wednesday The sherif on huntynge was gone, And Litel John lay in his bed And was foriete (forgotten) at home. Therfore he was fastinge Til it was past the none: Gode sir stuarde, I pray to the, Gyue me my dynere, saide Litell John. It is longe for Grenelefe Fastinge thus for to be Therfor I pray the, sir stuarde, Mi dyner gif me. Shalt thou neuer ete ne drynke, saide the stuarde, Tyll my lorde be come to towne; I make myn auowe to God, saide Litell John, I had leuer to crake thy crowne. The boteler was full vncurteys There he stode on flore; He start to the botery (buttery) And shet fast the dore. Lytell Johnn gaue the boteler suche a tap His backe went nere in two; Thoug[h] he liued an hundred ier The wors shuld he be go. He sporned the dore with his fote, It went open wel and fyne; And therfore he made large lyueray Bothe of ale and of wyne. Sith ye wol nat dyne, sayde Litell John, I shall gyue you to drinke; And though ye lyue an hundred vrynter On Lytel Johnn ye shall thinke. Litell John ete and Litel John drank The while that he wolde; The sherife had in his kechyn a coke, A stoute man and a bolde. I make myn auowe to God, saide the coke, Thou arte a shrewde hyne (hind, servant) in ani hous for to dwel For to aske thus to dyne. And there he lent Litell John God[e] strokis thre; I make myn auowe to God, sayde Lytell John, These strokis lyked well me. Thou arte a bold man and hardy, And so thinketh me; And or I pas fro this place Assayed better shalt thou be. Lytell Johnn drew a ful gode sworde, The coke toke another in hande; They thought no thynge for to fle, But stifly for to stande. There they faught sore togedere Two myle way and well more; Myght neyther other harme done, The mountnaunce (duration) of an owre. I make myn auowe to God, sayde Litell Johnn, And by my true lewte, Thou art one of the best sworde men That euer yit sawe I [me]. Cowdest thou shote as well in a bowe, To grene wode thou shuldest with me; And two times in the yere thy clothinge Chaunged shulde be; And euery yere of Robyn Hode Twenty merke to thy fe. Put vp thy swerde, saide the coke, And felowes woll we be. Thanne he fet to Lytell Johnn The nowmbles of a do, Gode brede, and full gode wyne; They ete and drank theretoo. And when they had dronkyn well Theyre trouthes togeder they plight, That they wo[l]de be with Robyn That ylke same nyght. They dyd them to the tresoure hows As fast as they myght gone; The lokkis, that were of full gode stele, They brake them euerichone. They toke away the siluer vessell And all that thei mig[h]t get; Pecis (vessels), [m]asars (maplewood bowls), ne sponis Wolde thei not forget. Also [they] toke the gode pens, Thre hundred pounde and more, And did them st[r]eyte to Robyn Hode Under the grene wode hore (grey, i.e., leafless). God the saue, my dere mayster, And Criste the saue and se! And thanne sayde Robyn to Litell Johnn, Welcome myght thou be; Also be that fayre yeman Thou bryngest there with the; What tydynges fro Noty[n]gham? Lytill Johnn, tell thou me. Well the gretith the proude sheryf, And sen[t]e the here by me His coke and his siluer vessell And thre hundred pounde and thre. I make myn auowe to God, sayde Robyn, And to the Trenyte, It was neuer by his gode wyll This gode is come to me. Lytyll Johnn there hym bethought On a shrewde wyle; Fyue myle in the forest he ran, Hym happed all his wyll (everything he wanted happened). Than he met the proude sheref Hyntynge with houndes and home; Lytell Johnn coude of curtesye, And knelyd hym beforne. God the saue, my dere mayster, And Criste the saue and se! Reynolde Grenelefe, sayde the shyref, Where hast thou nowe be? I haue be in this forest; A fayre syght can I se; It was one of the fayrest syghtes That cuer yet sawe I me. Yonder I sawe a ryght fayre harte, His coloure is of grene; Seuen score of dere vpon a herde Be with him all bydene (together). Their tyndes (branches of antlers) are so sharpe, maister, Of sexty and well mo, That I durst not shote for drede Lest they wolde me slo. I make myn auowe to God, sayde the shyre[f], That syght wolde I fayne se. Buske you thyderwarde, my dere mayster, Anone, and wende with me. The sherif rode, and Litell Johnn Of fote he was full smerte, And whane they came before Robyn, Lo, sir, here is the mayster-herte. Still stode the proude sherief, A sory man was he: Wo the worthe, Raynolde Grenelefe, Thou hast betrayed nowe me. I make myn auowe to God, sayde Litell Johnn, Mayster, ye be to blame; I was mysserued of my dynere Whan I was with you at home. Sone he was to souper sette And serued well with siluer white, And whan the sherif sawe his vessell For sorowe he myght nat ete. Make glad chere, sayde Robyn Hode, Sherif, for charite, And for the loue of Litill Johnn Thy lyfe I graunt to the. Whan they had souped well The day was al gone; Robyn commaunde[d] Litell Johnn To drawe of his hosen and his shone, His kirtell (tunic), and his cote of pie (short cloak) That was fured well and fine, And to[ke] hym a grene mantel To lap his body therin. Robyn commaundyd his wight yonge men Vnder the grene wode tree, They shulde lye in that same sute That the sherife myght them see. All nyght lay the proude sherif In his breche and in his [s]chert; No wonder it was in grene wode Though his sydes gan to smerte (smart, hurt). Make glade chere, sayde Robyn Hode, Sheref, for charite; For this is our ordre iwys Vnder the grene wode tree. This is harder order, sayde the sherief, Than any ankir (anchorite) or frere; For all the golde in mery Englonde I wolde nat longe dwell her[e]. All this twelue monthes, sayde Robyn, Thou shalt dwell with me; I shaff the teche, proude sherif, An outlawe for to be. Or I be here another nyght, sayde the sherif, Robyn, nowe pray I the, Smyte of mijn hede rather to-morowe And I forgyue it the. Lat me go, than sayde the sherif, For saynte charite, And I woll be the best frende That euer yet had ye. Thou shalt swere me an othe, sayde Robyn, On my bright bronde: Shalt thou neuer awayte (plot) me scade (scathe, harm) By water ne by lande. And if thou fynde any of my men By nyght or [by] day, Vpon thyn othe thou shalt swere To helpe them tha[t] thou may. Nowe hathe the sherif sworne his othe, And home he began to gone; He was as full of grene wode As euer was hepe of stone. The Fourth Fytte The sherif dwelled in Notingham, He was fayne (glad) he was agone; And Robyn and his mery men Went to wode anone. Go we to dyner, sayde Littell Johnn; Robyn Hode sayde, Nay; For I drede Our Lady be wroth with me, For she sent me nat my pay. Haue no doute, maister, sayde Litell Johnn, Yet is nat the sonne at rest; For I dare say and sauely swere The knight is true and truste. Take thy bowe in thy hande, sayde Robyn, Late Much wende with the, And so shal Wyllyam Scarlok, And no man abyde with me. And walke vp vnder the Sayles And to Watlynge-strete, And wayte after some vnketh gest; Vp-chaunce ye may them mete. Whether he be messengere Or a man that myrthes can (can make jests), Of my good he shall haue some Yf he be a pore man. Forth then stert Lytel Johan Half in tray (vexation) and tene, And gyrde hym with a full good swerde Under a mantel of grene. They went vp to the Sayles, These yemen all thre; They loked est, they loked west, They myght no man se. But as [they] loked in Bernysdale By the hye waye, Than were they ware of two blacke monkes Eche on a good palferay. Then bespake Lytell Johan, To Much he gan say: I dare lay my lyfe to wedde (wager) That [these] monkes haue brought our pay. Make glad chere, sayd Lytell Johan, And frese your bowes of ewe, And loke your hertes be seker (secure) and sad (firm), Your strynges trusty and trewe. The monke hath two and fifty [men] And seuen somers (sumpters, pack-horses) full stronge; There rydeth no bysshop in this londe So ryally, I vnderstond. Brethem, sayd Lytell Johan, Here are no more but we thre; But we brynge them to dyner, Our mayster dare we not se. Bende your bowes, sayd Lytell Johan, Make all yon prese to stonde; The formost monke, his lyfe and his deth Is closed in my honde. Abyde, chorle monke, sayd Lytell Johan, No ferther that thou gone; Yf thou doost, by dere worthy God, Thy deth is in my honde. And euyll thryfte (luck) on thy hede, sayd Lytell Johan, Ryght vnder thy hattes bonde; For thou hast made our mayster wroth He is fastynge so longe. Who is your mayster? sayd the monke; Lytell Johan sayd, Robyn Hode; He is a stronge thefe, sayd the monke, of hym herd I neuer good. Thou lyest, than sayd Lytell Johan, And that shall rewe the; He is a yeman of the forest, To dyne he hath bode the. Much was redy with a bolte (short, blunt arrow), Redly and anone, He set the monke to-fore the brest To the grounde that he can gone. Of two and fyfty wyght yonge yemen There abode not one, Saf a lytell page and a grome, To lede the somers with Lytel Johan. They brought the monke to the lodge-dore Whether he were loth or lefe, For to speke with Robyn Hode, Maugre in [his] tethe (despite his resistance). Robyn dyde adowne his hode The monke whan that he se; The monk was not so curteyse, His hode then let he be. He is a chorle, mayster, by dere worthy God, Than sayd Lytell Johan; Thereof no force (matter), sayd Robyn, For curteysy can he none. How many men, sayd Robyn, Had this monke, Johan? Fyfty and two whan that we met, But many of them be gone. Let blowe a horne, sayd Robyn, That felaushyp may vs knowe. Seuen score of wyght yemen Came pryckynge (spurring) on a rowe. And euerych of them a good mantell of scarlet and of raye (striped cloth); All they came to good Robyn To wyte what he wolde say. They made the monke to wasshe and wype And syt at his denere; Robyn Hode and Lytell Johan They serued him both in-fere (together). Do gladly, monke, sayd Robyn, Gramercy, syr, sayde he. Where is your abbay, whan ye are at home, And who is your avowe (patron)? Saynt Mary abbay, sayd the monke, Though I be symple (of humble rank) here. In what offyce? sayd Robyn: Syr, the hye selerer. Ye be the more welcome, sayd Robyn, So euer mote I the (may I prosper thee); Fyll of the best wyne, sayd Robyn, This monke shall drynke to me. But I haue grete meruayle, sayd Robyn, Of all this longe day; I drede Our Lady be wroth with me, She sent me not my pay. Haue no doute, mayster, sayd Lytell Johan,’ Ye haue no nede, I saye; This monke it hath brought, I dare well swere, For he is of her abbay. And she was a borowe (surety), sayd Robyn, Betwene a knyght and me, Of a lytell money that I hym lent Under the grene wode tree. And yf thou hast that syluer ibrought, I pray the let me se; And I shall helpe the eftsones (eftsoons) Yf thou haue nede to me. The monke swere a full grete othe With a sory chere: Of the borowehode thou spekest to me Herde I neuer ere. I make myn avowe to God, sayd Robyn, Monke, thou art to blame; For God is holde a ryghtwys man And so is his dame. Thou toldest with thyn owne tonge, Thou may not say nay, How thou arte her seruaunt And seruest her euery day. And thou art made her messengere My money for to pay; Therefore I cun the more thanke Thou arte come at thy day. What is in your cofers? sayd Robyn, Trewe than tell thou me. Syr, he sayd, twenty marke, Al so mote I the. Yf there be no more, sayd Robyn, I wyll not one peny; Yf thou hast myster (need) of ony more Syr, more I shall lende to the. And yf I fynde [more, sayd] Robyn, I-wys thou shalte it forgone; For of thy spendynge-syluer, monke, Thereof wyll I ryght none. Go nowe forthe, Lytell Johan, And the trouth tell thou me; If there be no more but twenty marke, No peny that I se. Lytell Johan spred his mantell downe As he had done before, And he tolde out of the monkes male (coffer) Eyght [hondred] pounde and more. Lytell Johan let it lye full styll And went to hiss mayster in hast: Syr, he sayd, the monke is trewe ynowe, Our Lady hath doubled your cast. I make myn avowe to God, sayd Robyn —Monke, what tolde I the?— Our Lady is the trewest woman That euer yet founde I me. By dere worthy God, sayd Robyn, To seche (search) all Englond thorowe, Yet founde I neuer to my pay (reward) A moche better borowe. Fyll of the best wyne and do hym drynke, sayd Robyn, And grete well thy lady hende (gracious), And yf she haue nede to Robyn Hode A frende she shall hym fynde. And yf she nedeth ony more syluer Come thou agayne to me And, by this token she hath me sent, She shall haue such thre. The monke was goynge to London ward, There to holde grete mote (meeting), The knyght that rode so hye on hors, To brynge hym vnder fote. Whether be ye away? sayd Robyn: Syr, to maners (manors) in this londe, To reken with our reues (estate managers) That haue done moch wronge. Come now forth, Lytell Johan, And harken to my tale; A better yem[a]n I knowe none To seke a monkes male. How moch is in yonder other corser? sayd Robyn, The soth must we see. By Our Lady, than sayd the monke, That were no curteysye To bydde a man to dyner, And syth (then) hym bete and bynde! It is our olde maner, sayd Robyn, To leue but lytell behynde. The monke toke the hors with spore, No lenger wolde he abyde; Aske to drynke, than sayd Robyn, Or that ye forther ryde. Nay, for God, than sayd the monke, Me reweth I cam so nere; For better chepe I myght haue dyned In Blythe or in Dankestere. Grete well your abbot, sayd Robyn, And your pryour, I you pray, And byd hym sende me such a monke To dyner euery day. Now lete we that monke be styll And speke we of that knyght; Yet he came to holde his day Whyle that it was lyght. He dyde him streyt to Bernysdale Under the grene-wode tre, And he founde there Robyn Hode And all his mery meyne. The knyght lyght doune of his good palfray, Robyn whan he gan see; So curteysly he dyde adoune his hode And set hym on his knee. God the saue, Robyn Hode, And all this company! Welcome be thou, gentyll knyght, And ryght welcome to me. Than bespake hym Robyn Hode To that knyght so fre: What nede dryueth the to grene wode? I praye the, syr knyght, tell me. And welcome be thou, ge[n]tyll knyght, Why hast thou be so longe? For the abbot and the hye iustyce Wolde haue had my londe. Hast thou thy londe [a]gayne? sayd Robyn; Treuth than tell thou me. Ye, for God, sayd the knyght, And that thanke I God and the. But take not a grefe, sayd the knyght, that I haue be so longe; I came by a wrastelynge, And there I holpe a pore yeman With wronge was put behynde. Nay, for God, sayd Robyn, Syr knyght, that thanke I the; What man that helpeth a good yeman His frende than wyll I be. Haue here foure hondred pounde, than sayd the knyght, The whiche ye lent to me; And here is also twenty marke For your curteysy. Nay, for God, than sayd Robyn, Thou broke (broker, use) it well for ay; For Our Lady by her selerer Hath sent to me my pay; And yf I toke it i-twyse A shame it were to me: But trewely, gentyll knyght, Welcom arte thou to me. Whan Robyn had tolde his tale He leugh and had good chere; By my trouthe, then sayd the knyght, Your money is redy here. Broke it well, sayd Robyn, Thou gentyll knyght so fre; And welcome be thou, ge[n]tyll knyght, Under my trystell-tre (tryst-tree). But what shall these bowes do? sayd Robyn, And these arowes ifedred fre (fine-feathered)? By God, than sayd the knyght, A pore present to the. Come now forth, Lytell Johan, And go to my treasure, And brynge me there foure hondred pounde; The monke ouer-tolde it me. Haue here foure hondred pounde, Thou gentyll knyght and trewe, And bye hors and harnes good And gylte thy spores all newe. And yf thou fayle ony spendynge Com to Robyn Hode, And by my trouth thou shalt none fayle The whyles I haue any good. And broke well thy foure hondred pound Whiche I lent to the, And make thy selfe no more so bare By the counsell of me. Thus than holpe hym good Robyn, The knyght all of his care: God that syt in heuen hye Graunte vs well to fare! The Fyfth Fytte Now hath the knyght his leue i-take And wente hym on his way; Robyn Hode and his mery men Dwelled styll full many a day. Lyth and lysten, gentil men, And herken what I shall say —How the proud sheryfe of Notyngham Dyde crye a full fayre play; That all the best archers of the north Sholde come vpon a day, And [he] that shoteth allther best The game shall bere a way. He that shoteth allther best, Furthest, fayre and lowe, At a payre of fynly buttes Under the grene-wode shawe (copse), A ryght good arowe he shall haue, The shaft of syluer whyte, The hede and the feders of ryche rede golde; In Englond is none lyke. This than herde good Robyn Under his trystell-tre: Make you redy, ye wyght yonge men; That shotynge wyll I se. Buske you, my mery yonge men, Ye shall go with me; And I wyll wete (know) the shryues fayth, Trewe and yf he be. Whan they had theyr bowes i-bent, Theyr takles fedred fre, Seuen score of wyght yonge men Stode by Robyns kne. Whan they cam to Notyngham The buttes were fayre and longe; Many was the bolde archere That shoted with bowes stronge: There shall but syx shote with me, The other shal kepe my he[ue]de (head) And stand with good bowes bent That I be not desceyued. The fourth outlawe his bowe gan bende, And that was Robyn Hode; And that behelde the proud sheryfe, All by the but he stode. Thryes Robyn shot about (in turn) And alway he slist the wand, And so dyde good Gylberte Wyth the whyte hande. Lytell Johan and good Scatheloke Were archers good and fre; Lytell Much and good Reynolde, The worste wolde they not be. Whan they had shot aboute, These archours fayre and good, Euermore was the best, For soth, Robyn Hode. Hym was delyuered the good arowe, For best worthy was he; He toke the yeft (gift) so curteysly, To grene wode wolde he. They cryed out on Robyn Hode And grete hornes gan they blowe: Wo worth the, treason! sayd Robyn, Full euyl thou art to knowe. And wo be thou, thou proude sheryf, Thus gladdynge thy gest; other wyse thou behote (promised) me In yonder wylde forest. But had I the in grene wode Under my trystell-tre, Thou sholdest leue me a better wedde (pledge) Than thy trewe lewte (loyalty). Full many a bowe there was bent, And arowes let they glyde; Many a kyrtell (tunic) there was rent And hurt many a syde. The outlawes shot was so stronge That no man myght them dryue, And the proud sheryfes men They fled away full blyue (quickly). Robyn sawe the busshement (ambush) to-broke, In grene wode he wolde haue be; Many an arowe there was shot Amonge that company. Lytell Johan was hurte full sore With an arowe in his kne That he myght neyther go nor ryde; It was full grete pyte. Mayster, then sayd Lytell Johan, If euer thou louest me, And for that ylke lordes loue That dyed vpon a tre, And for the medes (meed, wages) of my seruyce That I haue serued the, Lete neuer the proude sheryf Alyue now fynde me. But take out thy browne swerde And smyte all of my hede, And gyue me woundes depe and wyde; No lyfe on me be lefte. I wolde not that, sayd Robyn, Johan, that thou were slawe, For all the golde in mery Englonde Though it lay now on a rawe. God forbede, sayd Lytell Much, That dyed on a tre, That thou sholdest, Lytell Johan, Parte our company. Up he toke hym on his backe And bare hym well a myle; Many a tyme he layd hym downe, And shot another whyle. Then was there a fayre castell A lytell within the wode; Double-dyched it was about And walled, by the rode. And there dwelled that gentyll knyght Syr Rychard at the Lee, That Robyn had lent his good Under the grene-wode tree. In he toke good Robyn And all his company: Welcome be thou, Robyn Hode, Welcome arte thou to me; And moche [I] thanke the of thy comfort And of thy curteysye And of thy grete kyndenesse Under the grene-wode tre. I loue no man in all this worlde So much as I do the; For all the proud sheryf of Notyngham Ryght here shalt thou be. Shyt the gates and drawe the brydge And let no man come in, And arme you well and make you redy, And to the walles ye wynne (wend, go). For one thynge, Robyn, I the behote; I swere by Saynt Quyntyne, These forty dayes thou wonnest with me, To soupe, ete, and dyne. Bordes were layde and clothes were spredde, Redely and anone; Robyn Hode and his mery men To mete can they gone. The Sixth Fytte Lythe and lysten, gentylmen, And herkyn to your songe: Howe the proude shyref of Notyngham And men of armys stronge Full fast cam to the hye shyref The contre (country) vp to route (raise), And they besette the knyghtes castell, The walles all aboute. The proude shyref loude gan cry, And sayde, Thou traytour kniaht, Thou kepest here the kynges enemys Agaynst the lawe and right. Syr, I wyll auowe that I haue done The dedys that here be dyght Vpon all the landes that I haue, As I am a trewe knyght. Wende furth, sirs, on your way, And do no more to me Tyll ye wyt oure kynges wille, What he wyll say to the. The shyref thus had his answere Without any lesynge (lying); [Fu]rth he yede to London towne All for to tel our kinge. Ther he telde him of that knight And eke of Robyn Hode, And also of the bolde archars That were so noble and gode. He wyll auowe that he hath done To mayntene the outlawes stronge; He wyll be lorde and set you at nought In all the northe londe. I wyl be at Notyngham, saide our kynge, Within this fourteenyght (fortnight), And take I wyll Robyn Hode, And so I wyll that knight. Go nowe home, shyref, sayde our kynge, And do as I byd the; And ordeyn gode archers ynowe of all the wyde contre. The shyref had his leue itake And went hym on his way, And Robyn Hode to grene wode Vpon a certen day. And Lytel John was hole (whole, well) of the arowe That shote was in his kne, And dyd hym streyght to Robyn Hode Vnder the grene wode tree. Robyn Hode walked in the forest Vnder the leuys grene; The proude shyref of Notyngham Thereof he had grete tene. The shyref there fayled of Robyn Hode, He myght not haue his pray; Than he awayted this gentyll knyght Bothe by nyght and day. Euer he wayted the gentyll knyght Syr Richarde at the Lee, As he went on haukynge by the ryuer syde And lete [his] haukes flee (fly). Toke he there this gentyll knight With men of armys stronge, And led hym to Notyngham warde Bounde bothe fote and hande. The sheref sware a full grete othe Bi hym that dyed on rode, He had leuer than an hundred [pound] That he had Robyn Hode. This harde the knyghtes wyfe, A fayr lady and a free; She set hir on a gode palfrey, To grene wode anone rode she. Whanne she cam in the forest Vnder the grene wode tree, Fonde she there Robyn Hode And al his fayre mene. God the saue, gode Robyn, And all thy company; For Our dere Ladyes sake A bone (boon) graunte thou me. Late (let) neuer my wedded lorde Shamefully slayne be; He is fast bowne to Notingham warde For the loue of the. Anone than saide goode Robyn To that lady so fre: What man hath your lorde [i-]take? [The proude shyref, than saide she.] [The proude shyref hath hym i-take] For soth as I the say; He is nat yet thre myeles Passed on his way. Vp than sterte gode Robyn As man that had ben wode (mad, furious): Buske you, my mery men, For hym that dyed on rode. And he that this sorowe forsaketh, By hym that dyed on tre, Shall he neuer in grene wode No lenger dwel with me. Sone there were gode bowes bent Mo than seuen score; Hedge ne dyche spared they none That was them before. I make myn auowe to God, sayde Robyn, The sherif wolde I fayne see; And if I may hym take, Iquyte (requited) shall it be. And whan they came to Notingham They walked in the strete; And with the proude sherif iwys Sone can they mete. Abyde, thou proude sherif, he sayde, Abyde and speke with me; Of some tidinges of oure kinge I wolde fayne here of the. This seuen yere, by dere worthy God, Ne yede I this fast on fote; I make myn auowe to God, thou proude sherif, It is nat for thy gode. Robyn bent a full goode bowe, An arrowe he drowe at wyll; He hit so the proude sherife Vpon the grounde he lay full still. And or he myght vp aryse on his fete to stonde, He smote of the sherifs hede With his bright bronde. Lye thou there, thou proude sherife, Euyll mote (may) thou cheue (achieve, end)! There myght no man to the[e] truste The whyles thou were a lyue. His men drewe out theyr bryght swerdes That were so sharpe and kene, And layde on the sheryues men And dryued them downe bydene (successively). Robyn stert to that knyght And cut a two his [bonde], And toke hym in his hand a bowe And bad hym by hym stonde. Leue thy hors the behynde And lerne for to renne; Thou shalt with me to grene wode Through myre, mosse, and fenne. Thou shalt with me to grene wode, Without any leasynge (lying), Tyll that I haue gete vs grace Of Edwarde our comly kynge. The Seuenth Fytte The kynge came to Notynghame With knyghtes in grete araye, For to take that gentyll knyght And Robyn Hode, yf he may. He asked men of that countre After Robyn Hode, And after that gentyll knyght That was so bolde and stout. Whan they had tolde hym the case, Our kynge vnderstode ther tale And seased in his honde The knyghtes londes all. All the passe (extent) of Lancasshyre He went both ferre and nere Tyll he came to Plomton Parke; He fayled many of his dere. Ther our kynge was wont to se Herdes many one, He coud vnneth (scarcely) fynde one dere That bare ony good horne. The kynge was wonder wroth withall And swore by the Trynyte: I wolde I had Robyn Hode, With eyen I myght hym se. And he that wolde smyte of the knyghtes hede And brynge it to me, He shall haue the kynghtes londes, Syr Rycharde at the Le. I gyue it hym with my charter, And sele it [with] my honde, To haue and holde for euer more in all mery Englonde. Than bespake a fayre olde knyght That was treue in his fay: A, my leege lorde the kynge, one worde I shall you say. There is no man in this countre May haue the knyghtes londes Whyle Robyn Hode may ryde or gone And bere a bowe in his hondes, That he ne shall lese his hede That is the best ball in his hode; Giue it no man, my lorde the kynge, That ye wyll any good. Half a yere dwelled our comly kynge In Notyngham, and well more; Coude he not here of Robyn Hode, in what countre that he were. But alway went good Robyn By halke (corner, hiding-place) and eke by hyll, And alway slewe the kynges dere And welt (disposed) them at his wyll. Than bespake a proude fostere That stode by our kynges kne: Yf ye wyll se good Robyn, Ye must do after me. Take fyue of the best knyghtes That be in your lede (retinue), And [walke] downe by yon abbay And gete you monkes wede (weed, clothing). And I wyll be your ledes-man And lede you the way, And or ye come to Notyngham My hede then dare I lay That ye shall mete with good Robyn, On lyue yf that he be; Or ye come to Notyngham With eyen ye shall hym se. Full hast[e]ly our kynge was dyght, So were his knyghtes fyue, Euerych of them in monkes wede, And hasted them thyder bly[u]e. Our kynge was grete aboue his cole (cowl), A brode hat on his crowne; Ryght as he were abbot-lyke They rode up in-to the towne. Styf botes (boots) our kynge had on, Forsoth as I you say; He rode syngyngc to grene wode; The couent (monks’ ‘convent’) was clothed in graye. His male-hors and his grete somers Folowed our kynge behynde Tyll they came to grene wode, A myle vnder the lynde. There they met with good Robyn Stondynge on the waye, And so dyde many a bold archere, For soth as I you say. Robyn toke the kynges hors Hastely in that stede, And sayd, Syr abbot, by your leue, A whyle ye must abyde. We be yemen of this foreste Vnder the grene-wode tre; We lyue by our kynges dere, [Other shyft haue not wee.] And ye haue chyrches and rentes both, And gold full grete plente; Gyue vs some of your spendynge For saynt[e] charyte. Than bespake our cumly kynge, Anone than sayde he: I brought no more to grene wode But forty pounde with me. I haue layne at Notyngham This fourtynyght with our kynge, And spent I haue full moche good On many a grete lordynge. And I haue but forty pounde, No more than haue I me; But yf I had an hondred pounde I wolde vouch it safe on the. Robyn toke the forty pounde And departed it in two partye; Halfendell he gaue his mery men And bad them mery to be. Full curteysly Robyn gan say: Syr, haue this for your spendyng, We shall mete another day. Gramercy, than sayd our kynge: But well the greteth Edwarde our kynge, And sent to the his seale, And byddeth the com to Notyngham Both to mete and mele. He toke out the brode targe (seal) And sone he lete hym se; Robyn coud (knew) his courteysy And set hym on his kne. I loue no man in all the worlde Se well as I do my kynge; Welcome is my lordes seale, And monke, for thy tydynge; Syr abbot, for thy tydynges To day thou shalt dyne with me For the loue of my kynge Under my trystell-tre. Forth he lad our comly kynge Full fayre by the honde; Many a dere there was slayne, And full fast dyghtande (prepared). Robyn toke a full grete horne And loude he gan blowe; Seuen score of wyght yonge men Came redy on a rowe. All they kneled on theyr kne Full fayre before Robyn; The kynge sayd hym selfe vntyll And swore by Saynt Austyn: Here is a wonder semely syght; Me thynketh, by Goddes pyne, His men are more at his byddynge Then my men be at myn. Full hastfelly was theyr dyner idyght And therto gan they gone; They serued our kynge with al theyr myght, Both Robyn and Lytell Johan. Anone before our kynge was set The fatte venyson, The good whyte brede, the good rede wyne, And therto the fyne ale and browne. Make good chere, said Robyn, Abbot, for charyte; And for this ylke tydynge Blyssed mote thou be. Now shalte thou se what lyfe we lede Or thou hens wende, Than thou may enfourme our kynge Whan ye togyder lende (come). Up they sterte all in hast, Theyr bowes were smartly bent; Our kynge was neuer so sore agast, He wende to haue be shente. Two yerdes (rods) there were vp set, Thereto gan they gange; By fyfty pase (lengths), our kynge sayd, The merkes were to longe. On euery syde a rose-garlonde, They shot vnder the lyne: Who so fayleth of the rose-garlonde, sayd Robyn, His takyll (panoply) he shall tyne And yelde it to his mayster, Be it neuer so fyne; For no man wyll I spare, So drynke I ale or wyne; And bere a buffet on his hede [I-]wys ryght all bare. And all that fell in Robyns lote, He smote them wonder sare. Twyse Robyn shot aboute And euer he cleued the wande, And so dyde good Gylberte With the Whyte Hande. Lytell Johan and good Scathelocke, For nothynge wolde they spare; When they fayled of the garlonde Robyn smote them full sore. At the last shot that Robyn shot For all his frendes fare Yet he fayled of the garlonde Thre fyngers and mare. Than bespake good Gylberte, And thus he gan say: Mayster, he sayd, your takyll is lost, Stande forth and take your pay. If it be so, sayd Robyn, That may no better be; Syr abbot, I delyuer the myn arowe (array); I pray the, syr, serue thou me. It falleth not for myn ordre, sayd our kynge, Robyn, by thy leue, For to smyte no good yeman, For doute I sholde hym greue (harm). Smyte on boldely, sayd Robyn, I giue the large leue. Anone our kynge, with that worde, He folde vp his sleue; And sych a buffet he gaue Robyn, To grounde he yede full nere; I make myn avowe to God, sayd Robyn, Thou arte a stalworthe frere. There is pith in thyn arme, sayd Robyn, I trowe thou canst well shote. Thus our kynge and Robyn Hode Togeder than (then) they met[e]. Robyn behelde our comly kynge Wystly (intently) in the face; So dyde Syr Rycharde at the Le, And kneled downe in that place. And so dyde all the wylde outlawes Whan they se them knele: My lorde the kynge of Englonde, Now I knowe you well. Mercy then, Robyn, sayd our kynge, Vnder your trystyll-tre, of thy goodnesse and thy grace, For my men and me. Yes, for God, sayd Robyn, And also God me saue, I aske mercy, my lorde the kynge, And for my men I craue. Yes, for God, than sayd our kynge, And therto sent I me, With that thou leue the grene wode, And all thy company; And come home, syr, to my courte, And there dwell with me. I make myn avowe to God, sayd Robyn, And ryght so shall it be. I wyll come to your courte, Your seruyse for to se, And brynge with me of my men Seuen score and thre. But me lyke well your seruyse I come agayne full soone, And shote at the donne (dun) dere As I am wonte to done. The Eighth Fytte Haste thou ony grene cloth, sayd our kynge, That thou wylte sell nowe to me? Ye, for God, sayd Robyn, Thyrty yerdes and thre. Robyn, sayd our kynge, Now pray I the, Sell me some of that cloth To me and my meyne (company). Yes, for God, then sayd Robyn, Or elles I were a fole; Another day ye wyll me clothe, I trowe, ayenst the Yole (Yule). The kynge kest (cast) of his cole (cowl) then, A grene garment he dyde on; And euery knyght also, i-wys, Another had full sone. Whan they were clothed in Lyncolne grene They keste away theyr graye; Now we shall to Notyngham, All thus our kynge gan say. Theyr bowes bente, and forth they went Shotynge all in-fere (in company) Towarde the towne of Notyngham, Outlawes as they were. Our kynge and Robyn rode togyder, For soth as I you say, And they shote plucke-buffet (a buffet per miss) As they went by the way. And many a buffet our kynge wan Of Robyn Hode that day; And nothynge spared good Robyn Our kynge in his pay. So God me helpe, sayd our kynge, Thy game is nought to lere (learn); I sholde not get a shote of the Though I shote all this yere. All the people of Notyngham They stode and behelde; They sawe nothynge but mantels of grene That couered all the felde. Than euery man to other gan say: I drede our kynge be slone; Come Robyn Hode to the towne, i-wys On lyue he lefte neuer one. Full hast[e]ly they began to fle, Both yemen and knaues, And olde wyues that myght euyll goo, They hypped on theyr staues. The kynge l[o]ughe full fast And commaunded theym agayne (back); When they se our cornly kynge I-wys they were full fayne (pleased). They ete and dranke and made them glad, And sange with notes hye; Than bespake our comly kynge To Syr Rycharde at the Lee. He gaue hym there his londe agayne, A good man he bad hym be; Robyn thanked our comly kynge And set hym on his kne. Had Robyn dwelled in the kynges courte But twelue monethes and thre, That [he had] spent an hondred pounde And all his mennes fe (wages). In euery place where Robyn came Euer more he layde downe (paid out), Both for knyghtes and for squyres, To gete hym grete renowne. By than the yere was all agone He had no man but twayne, Lytell Johan and good Scathelocke With hym all for to gone. Robyn sawe yonge men shote Full ferre vpon a day: Alas, than sayd good Robyn, My welthe is went away. Somtyme I was an archere good, A styffe and eke a stronge; I was com[pt]ed the best archere That was in mery Englonde. Alas, then sayd good Robyn, Alas and well a woo; Yf I dwele lenger with the kynge Sorowe wyll me sloo. Forth than went Robyn Hode Tyll he came to our kynge: My lorde the kynge of Englonde, Graunte me myn askynge. I made a chapell in Bernysda[l]e That semely is to se, It is of Mary Magdaleyne, And thereto wolde I be. I myght neuer in this seuen nyght No tyme slepe ne wynke, Nother all these seuen dayes Nother ete ne drynke. Me longeth sore to Bernysdale, I may not be therfro; Barefote and wolwarde (wearing wool) I haue hyght Thyder for to go. Yf it be so, than sayd our kynge, It may no better be; Seuen nyght I gyue the leue, No lengre, to dwell fro me. Gramercy, lorde, then sayd Robyn, And set hym on his kne; He toke his leue full courteysly, To grene wode then went he. Whan he came to grene wode In a mery mornynge, There he herde the notes small Of byrdes mery syngynge. It is ferre gone, sayd Robyn, That I was last here; Me lyste a lytell for to shote At the donne dere. Robyn slewe a full grete harte; His horne than gan he blow, That all the outlawes of that forest That horne coud they knowe, And gadred them togyder In a lytell throwe (space of time). Seuen score of wyght yonge men Came redy on a rowe, And fayre dyde of theyr hodes And set them on theyr kne: Welcome, they sayd, our mayster, Under this grene-wode tre. Robyn dwelled in grene wode Twenty yere and two; For all drede of Edwarde our kynge Agayne wolde he not goo. Yet he was begyled, i-wys, Through a wicked woman, The pryoresse of Kyrkesly, That nye was of hys kynne; For the loue of a knyght, Syr Roger of Donkesly, That was her owne speciall —Full euyll mote they the (may they fare)! They toke togyder theyr counsell Robyn Hode for to sle, And how they myght best do that dede His banis (murderers) for to be. Than bespake good Robyn In place where as he stode: To morow I muste to Kyrke[s]ly Craftely to be leten blode. Syr Roger of Donkestere By the pryoresse he lay, And there they betrayed good Robyn Hode Through theyr false playe. Cryst haue mercy on his soule That dyed on the rode; For he was a good outlawe And dyde pore men moch god[e].

*

Return to the List of Robin Hood Ballads

Return to the List of British Tales

Return to Main Index of Tales